Si rezultat i një pune shkencore shumëvjeçare, u bë e mundur që të botohet e të vihet në qarkullim libri: “Zhvillimi historik i mendimit teorik – juridik shqiptar” nga autorët prof.dr.Ismet Elezi dhe Ma. Ela Elezi.

Ky botim u realizua si rezultat i ndihmës së çmuar të mikut të dashur e të respektuar prof.dr. Maksim Haxhia, të cilit i shprehim falënderimet dhe mirënjohjen tonë të thellë.

Libri është vazhdim i botimit të parë (1999) i plotësuar e azhurnuar jo vetëm për periudhën deri në vitin 1999, por sidomos është pasuruar me arritjet e dhjetëvjeçarit në vijim 1999 – 2009.

Qëllimi i librit është të bëjë të njohura para opinionit të studentëve e të juristëve, si dhe të opinionit publik, botimet e autorëve shqiptarë në Shqipëri e në Kosovë.

Me keqardhje shënojmë, se duke mos pasur në dispozicion të gjitha botimet e autorëve shqiptarë jashtë Shqipërisë, nuk kemi mundur t’i pasqyrojmë në libër.

Mendimi teorik – juridik shqiptar përfshin të gjitha degët e së drejtës, duke filluar nga historia e shtetit dhe të së drejtës në Shqipëri e në Kosovë, në fushën e së drejtës kushtetuese, të së drejtës administrative, të së drejtës civile, të procedurës civile, familjare, të punës, tregtare dhe të financave, penale, procedurale penale, kriminalistikës, kriminologjisë, politikës kriminale, viktimologjisë e të së drejtës ndërkombëtare.

Veç këtyre në libër është trajtuar edhe mendimi teorik – juridik në shtypin periodik sipas fushave të së drejtës, në jurisprudencën shqiptare dhe për reformën në drejtësi.

Në kuadrin e jurisprudencës janë evidentuar disa vendime me karakter parimor të Kolegjeve të Bashkuara të Gjykatës së Lartë dhe Gjykatës Kushtetuese për disa çështje penale.

Si burime kryesore kanë shërbyer librat, tekstet universitare, revistat shkencore e profesionale, posaçërisht pas Luftës së Dytë Botërore e në vazhdimësi.

Libri jep njohuri kryesore për vlerat dhe nivelin shkencor të botimeve, si dhe nxjerr disa konkluzione kryesore, me të cilat argumentohet se botimet juridike janë pjesë përbërëse e kulturës sonë kombëtare, e cila, duke ruajtur identitetin e saj kombëtar ka bërë hapa të rëndësishëm për t’u integruar me dinjitet në atë evropiane.

Me këtë libër synohet të nxiten juristët e rinj, studiuesit në Shqipëri e në Kosovë, për ta zhvilluar në nivele më të larta mendimin teorik – juridik me botimet e tyre në fusha të ndryshme të së drejtës.

Shpresojmë e urojmë që ky libër t’u shërbejë studentëve të fakulteteve të drejtësisë, masterave, kandidatëve për doktoraturë, e juristëve të tjerë, për të njohur të kaluarën, që të përparojnë në të ardhmen.