Këto ditë doli në qarkullim libri: “Historia e së drejtës penale” e autorëve prof. dr. Ismet Elezi dhe Ma. Ela Elezi.

Në literaturën juridike penale të Shqipërisë ishte ndjerë prej kohësh nevoja e botimeve të posaçme për historinë e së drejtës penale të shteteve të huaja dhe të Shqipërisë.

Zhvillimi i lëndës së të drejtës penale në fakultetet e drejtësisë nuk mund të konsiderohet i plotë për formimin profesional të juristëve, pa njohur edhe zhvillimin historik të kësaj lënde në shtete të huaj dhe në Shqipëri.

Duke u nisur nga gjendja ekzistuese dhe nga qëllimi për të plotësuar deri diku këtë mangësi, autorët përgatitën dhe botuan këtë libër, pa pretenduar aspak se është i plotë e i përkryer, derisa kemi të bëjmë me periudha të gjata e sisteme të vendeve të ndryshme.

Studimi i historisë së të drejtës penale na jep njohuritë kryesore të përgjithshme për zhvillimin e rolin e saj në realizimin e funksionimit të saj mbrojtës, i cili nuk ka qenë i njëllojtë kudo e kurdoherë.

Kuptohet se për historinë e së drejtës penale të shteteve të huaja janë botuar vëllime të tëra në vende dhe kohë të ndryshme, kështu që në këtë libër janë pasqyruar vetëm disa njohuri kryesore, pa hyrë në analizën e hollësishme, sepse dilte jashtë kuadrit dhe mundësive. Megjithatë studimi i saj paraqet jo vetëm rendin historik, por edhe aktual, sepse shërben si model për të arritur edhe e drejta jonë penale standardet evropiane.

Pikërisht për këtë arsye pjesa e parë është përqendruar në paraqitjen e historikut të legjislacionit penal dhe mendimit teorik (shkollat kryesore) të së drejtës penale të shteteve të huaja.

Historia e së drejtës penale të Shqipërisë, është zhvilluar më e zgjeruar, duke përfshirë historinë e legjislacionit penal të periudhave të ndryshme, mendimin teorik në formë të përmbledhur (sepse për këtë është një botim i posaçëm i ri i autorëve) si dhe jurisprudenca e periudhës 1924 – 42, ajo e Kolegjeve të Bashkuara të Gjykatës së Lartë dhe Gjykatës Kushtetuese për disa çështje penale me karakter parimor.

Në mbyllje jepen disa përfundime kryesore.

Libri në tërësi u shërben studentëve, masterave dhe kandidatëve për doktoraturë të fakulteteve juridike, si dhe juristëve të tjerë për të rritur nivelin e tyre kulturor e juridik dhe për realizimin me cilësi të lartë të drejtësisë penale në praktikë.